‘Admin Officer ng QMC, napakasinungaling!

Nakatikim ng katakut-takot na sermon mula sa amin ni ‘Tol Erwin ang kolokay na Admin Officer V ng Quezon Medical Center na si Ruffa de Chavez.

Maligaya sana ang Pasko ng pamilyang Moulic na tubong Quezon Province kung maire-refund ng ospital ang kanyang P25,000.

Papauwi raw galing eskwelahan ang binatilyong nag­rereklamo ng mabangga ng van ang sinasakyan nilang tricycle na humantong sa pagkakabali ng kanyang buto.

Agad ‘tong sinugod sa QMC at kilos pronto rin na nagbigay ng tulong ang Philippine Charity Sweepstakes Office (PCSO) na nagkakahalaga ng P35,000 thru cash voucher.

Nang ooperahan na ang binatilyo ay humingi ng P25K cash ang ospital dahil bibilhin pa ang bakal na ikakabit sa kanya mula pa sa Maynila. Talagang segurista, pinakita lamang na ‘ala silang tiwala sa ahensya ng gob­yerno! Anong tingin n’yo sa PCSO manggagantso?

Sabi naman daw kasi ni Admin De Chavez ay refundable ito sa loob ng isang buwan subalit noong oras ng singilan ay dedma na ang ospital. Ngayon, anim na buwan na ang nakalipas ay nagmistulang inilista sa tubig ang kuwarta na kanilang pinambayad!

Para sa agarang aksyon, kinompronta namin si Ruffa at talagang kapalmuks niyang sinabi na dalas-dalasan pa raw ang follow-up para makuha na ang pera.

Wala pang isang minuto ay para bang nagulantang ang ginang na ‘di raw sa kanya naibigay ang voucher at cash na P25K. Anak ka ng hijo-de-puto, mukhang hanggang sa hukay ay igigiit ‘to ng aanga-angang officer!

Dahil mukhang nakalaklak ng agua de pataranta ang ginang at nakalimutan na ang nangyari noon ay dumiretso na kami sa Provincial Admin ng ospital na si Webster Letargo. Nangako naman siya na tututukan ang insidente at pagbabayarin ang dapat managot.

Uulitin ko Ruffa de Chavez hindi Quinto, hindi Gutierrez, kundi De Chavez! ‘Wag ka na makipagmatigasan kung alam mong mali ka naman. Magdasal ka na at magpakatino kung ayaw mong mapukpok sa bumbunan!

Kaya mga boss, kung gusto n’yo matunghayan ang mga seryoso, basag-trip, hambalos at laugh trip na kuwento kagaya nito ay bisitahin lamang ang aming official YouTube Channel na Bitag Official at ‘wag kalimutan na mag-subscribe para updated sa aming fresh uploads na videos para lamang sa inyo!