Pananagutan

NAPAKASAMA ng pakilasa ng lahat sa nangyaring pagkansela ng pamahalaan ng planong mass immunization o libreng bakuna laban sa dengue. Taas-noo na sana ang Pilipino bilang natatanging bansa sa mundo na humakbang nang mabilis upang protektahan ang kanyang mamamayan kontra sa grabeng epekto ng Dengue Hemorrhagic Fever. Malay ba natin na kulang pala sa nararapat na pagsuri at paniniguro ang desisyon ng pamahalaan. Imbes na makabuti sa iyo at sa akin, ang pinayagan nating iturok sa ating mga anak ang maari pang maging mitsa ng kanilang kapahamakan o, kung hindi maagapan, tuluyang kamatayan.

Napapanatag ng bahagya ang ating kalooban sa nakaambang na imbestigasyong gagawin ng ating mga ahensya ng gobyerno, kapwa sa ehekutibo at lehislatibo. Tinatayang masasagot ang mabibigat na katanungan tulad ng: (1) gaano ba kalala ang aasahang reaksyon sa kagat ng dengue mosquito kapag ika’y hindi pa nagka-dengue at first time mong nabakunahan; (2) yun namang mga nagka-dengue na ay sigurado bang mas protektado kapag mabakunahan; (3) paano ba nangyari na ang mismong supplier ng vaccine na tinanggap naman ang bayad ay siya ngayong nagsasalita laban sa sarili nitong produkto; (4) ano ang naging proseso ng pamahalaang P-Noy sa pagtulak at mabilisang pagpondo sa isang programa ng bakuna na wala naman sa regular na budget at ni wala sa plano ng National Immunization Program; (5) anong danyos ang makukuha natin galing sa supplier at sino ang pananaguting opisyal sa hindi maayos na desisyon? 

Iilan lamang ito sa mga paglilinaw na kakailanganin ng isang lipunang masama ang loob, lalo na iyung mga pamil­yang may miyembrong nakatanggap ng kontrobersyal na bakuna. Malaking mayorya ng naturukan ay pawang mga musmos na walang kamuwang muwang at walang kalaban-laban. Sa tindi ng pagnais nating masiguro ang kanilang kaligtasan, sa hindi inaasahang pagkakataon ay naging kasabwat pa tayo sa kanilang kapahamakan.

Ako man, bilang two time survivor ng dengue, ay bukas kamay na tinanggap at pinagmalaki pa ang inakalang ginhawa na libreng inireregalo ng gobyerno. Kailangang mabigyang kasagutan ang hinaing ng lipunan bago tuluyang maglaho  ang tiwala ng tao sa kanilang pamahalaan.