Talo ang pikon
DAPAT, kung may pumupuna sa mga programa o aktibidad ng pamahalaan, ituring itong oportunidad ng mga leader para maisaayos ang mga palatuntunang ipinatutupad.
Nasabi ko ito dahil tinawag na “ingrato” kamakailan ni PNP Chief, Director General Ronald “Bato” dela Rosa ang mga bumabatikos sa war on drugs ng administrasyon. Naiintindihan nating emosyonal masyado si dela Rosa lalu pa’t natutuligsa ang mga palatuntunan ng PNP na nauukol sa pagpuksa sa illegal drugs.
Ngunit may dahilan namang pumuna ang taumbayan dahil nabisto na nga ang kapalaluan ng ilang alagad ng batas na umaabuso sa tungkulin at walang habas na pumapatay, sukdulang madamay pati yung mga inosente. Ang nangyaring maramihang pagsibak sa mga pulis na pumapatay ng mga inbosenteng kabataan ay pag-amin na totoong may mga abuses na nangyayari sa operasyon kontra droga ng pulisya.
Ani dela Rosa, pati ang mga kritiko ng war on drugs ay nakikinabang naman sa programang ito ng PNP porke gumanda ang kapayapaan at kaayusan sa bansa. Marahil nga ay nabawasan, kung hindi man tuluyang napuksa ang mga krimen dulot ng pagkalango sa droga gaya ng mga brutal na pagpatay at mga rape cases. Pero tila napalitan naman ito ng sunod-sunod na pagkamatay ng mga binatilyo o menor de edad dulot ng pinaigting na kampanya laban sa mga pushers.
Nabisto rin sa pagtatapat ng mga pulis na umaayaw na sa extra judicial killings na may tagubilin ang mga nakatataas sa kanila na pumatay ng mga pushers at adik.
Kaya hindi dapat maging balat-sibuyas ang sino mang opisyal ng pamahalaan lalu na sa mga pagpuna na may mga basehan naman. Nasa demokrasya tayo at marapat dinggin ang tinig ng lahat ng sector ng lipunan at huwag masamain ang mga negatibong pagpuna.
- Latest