Labanan ang lamok

Sa ngayo’y abala itong sambayanan

Upang itong dengue ay mapaglabanan

Bata at matanda kapag dinapuan

Kundi mapalibing ay maoospital

Ganyan katindi ang kagat ng lamok

Na sa bansa ngayo’y masama ang dulot

Pati ang alkalde’y hindi makatulog

Agad nagpalabas nang maraming utos

Lipulin ang lamok sugpuin kaagad

Upang di kumalat virus o kamandag

Mga health personnel dapat na magmatyag

Sa lahat ng sektor nitong bayang liyag

Pinakilos niya ang mga tauhan

Upang mga pook na pinamumugaran

Ng lamok na carrier agad masumpungan

At saka bombahin ng todo’t lahatan

Pati mga bata saka mga titser

Sa utos ng mayor ay kumilos na rin

Kanilang serbisyo’y kinuha’t hiniling

Upang mga kanal kanilang linisin

Mga basurero’y pinakilos agad

Para ang marumi’y hindi nagkalat

Kapag ang basura’y laging nakatambak

Siguradong lamok iitlog kakalat