EDITORYAL - Kalimutan na ang peace talk
NOONG Miyerkules, muling sinabi ni Pres. Rodrigo Duterte na itigil na ang peace talks sa National Democratic Front of the Philippines (NDFP). Ito ay kasunod nang pag-ambush ng New People’s Army (NPA) sa mga miyembro ng Presidential Security Group (PSG) sa Arakan, North Cotabato na ikinamatay ng isa at ikinasugat ng limang iba pa. Halos kasabay nang pag-ambush sa PSG, dalawang Marines naman ang pinatay ng NPA sa Palawan. Namamalengke ang dalawang sundalo nang lapitan ng ilang lalaki at binaril sa ulo ang dalawang sundalo.
Sana nga, totoo na ang sinabi ni Duterte na ititigil na ang pakikipag-usap at hindi pawang pagbabanta lamang. Maraming beses nang sinabi ng Presidente na wala nang pakikipag-usap sa mga komunista pero makaraan ang ilang araw ay magbabago na naman siya ng posisyon at handa na raw makipag-usap.
Hindi pa natatagalan nang salakayin ng 40 NPA rebels ang police station sa Maasin at dinisarmahan ang mga pulis. Kinuha ang walong M-16 rifles at siyam na Glock 9-mm pistols. Ayon sa report, tatlong babae muna ang pumasok sa station at nagkunwaring magpa-file ng reklamo. At kasunod niyon ay ang pagsalakay na ng mga rebelde na ang iba ay nagdaan pa sa likuran ng police station.
Halos kasabay nang pagsalakay sa Maasin, isang army truck ang inambus ng mga NPA sa Quezon na ikinasugat ng dalawang sundalo. Magreresponde umano ang mga sundalo sa isang nangyayaring sunog sa Globe cell site na kagagawan din ng NPA nang maganap ang ambush. Huwag nang makipag-usap kahit kailan sa NDFP-CPP sapagkat sayang lamang dahil sa mga ginagawang pagsalakay ng NPA. Nagpapakita lamang na wala nang control ang communist group sa kanilang military arm. Kanya-kanya nang lakad ang grupo --- papatay kung gusto nila. Wala na ring ipinagkaiba ang NPA sa mga terorista kaya dapat huwag nang makipag-negosasyon sa kanila.
Huwag nang magbago ng pasya si Duterte at ipakitang mayroon siyang isang salita laban sa mga traidor na komunista.
- Latest
