Supt. Nobleza, Abu bomb expert kasal na
MANILA, Philippines - Hindi na pala nobyo kundi mag-asawa na sina Supt. Maria Cristina Nobleza at ang Abu bomb expert na si Reener Lou Dongon matapos magpakasal sa Muslim rites.
Ito ang kinumpirma kahapon ni Police Regional Office (PRO)-7 Director P/Chief Supt. Noli Taliño sa kanilang isinagawang imbestigasyon matapos na umibig ang babaeng opisyal sa bomb expert na dati nitong isinasailalim sa interogasyon sa pambobomba sa Cagayan De Oro City may ilang taon na ang nakakalipas.
“Talagang ikinasal sila sa parang isang Muslim rite kasi nag-Balik Islam (Muslim convert) itong si Supt. Nobleza”, ani Taliño.
Nabatid pa na si Supt.Nobleza ay nagpa-annul ng kasal noong 2010 kay Sr. Supt. Allan Nobleza, police attache sa Pakistan.
Sinabi naman ni PNP Spokesman Chief Supt. Dionardo Carlos na sinampahan na ng kasong illegal possession of firearms, obstruction of justice, resisting a person in authority si Supt. Nobleza habang ang lover nitong si Dongon ay resisting a person in authority kaugnay ng insidente.
Una nang ibinulgar ni PNP Chief P/Director General Ronald “Bato” dela Rosa na ‘sleeping with the enemy’ at nabuwang sa pag-ibig si Supt. Nobleza kay Dongon na naaresto habang itinatakas ang huli sa kasagsagan ng opensiba upang lipulin ang grupo ng mga bandidong Abu Sayyaf na nakapasok sa Bohol.
Noong Abril 22 ng gabi matapos mapatay sa engkuwentro ang apat na miyembro ng Abu Sayyaf kabilang si Joselito Melloria ay nasakote ang mga ito matapos na tangkaing umiwas sa checkpoint sa highway ng Brgy. Bacani sa bayan ng Clarin.
Si Supt. Nobleza ay sinibak sa puwesto bilang Deputy Regional Chief ng Davao Police Crime Laboratorty.
- Latest
