Durant gisugat og daog
CEBU, Philippines – Nagmadaugon sa iyang pagbalik og duwa si Kevin Durant human gilampurnas sa Golden State Warriors ang New Orleans Pelicans, 123-101, sa NBA kagahapong adlawa didto sa Oracle Arena sa Oakland, California.
Bisan og wala makapakita'g aksiyon sud sa unom ka semana gumikan sa angol sa iyang tuhod, daw sa wala matay-i ang abilidad ni Durant human siya mitapos og 16 puntos, 10 ka rebounds ug unom ka assists.
Tayming kaayo ang pagbuto ni Durant kay wala makaduwa si two-time MVP Stephen Curry kay dunay bun-og ang tuhod.
Si Klay Thompson mihipos og 20 puntos ug si Draymond Green mikadlit og 13 puntos alang sa Warriors nga miposte sa ika-14 nilang sagunson nga daog.
Didto sa New York, mibalik sab og duwa si Dwayne Wade apan ang Chicago Bulls nakatilaw og krusyal nga pilde batok sa Brooklyn Nets, 107-106, nga nakatagak kanila sa ikawalong puwesto sa Eastern Conference uban ang Miami Heat.
Sa laing mga aksiyon, si Damiam Lillard mikulit og franchise-record 59 puntos sa dihang gipakaging sa Portland Trail Blazers and Utah Jazz, 101-86, samtang si Chris Paul dunay 19 puntos ug si DeAndre Jordan mitali og 17 puntos ug 17 sab ka rebounds sa dihang gipiog sa LA Clippers ang San Antonio Spurs, 98-87, alang sa ikalima nilang sunod-sunod nga daog.
Wa sab magpabitin si Isaiah Thomas nga mipabuhagay og 32 puntos alang sa Boston Celtics nga mipakgang sa Charlotte Hornets, 121-114, aron pagpabuhi sa ilang tsansa ang No.1 seed sa East nga kasamtangan karong gipangulohan sa Cleveland Cavaliers.
Didto sa Philadephia, si Giannis Antetokounmpo dunay 20 puntos, 10 ka rebounds ug unom ka assists sa dihang gipayaka sa Milwaukee Bucks ang Sixers aron pag-angkon og luna sa playoffs. – EBV (FREEMAN)
- Latest
