Hipos sa mga libudsuroy

Daghan sa mga libudsuroy sa kadalanan ang gihipos karon sa kagamhanan sa dakbayan sa Sugbo nunot niining mga ministerial meetings sa Association of Southeast Asian Nations Summit nga dinhi gipahigayon sa Sugbo sa niaging semana.

Limpiyo na tuod ang pipila ka dalan sa siyudad, ilabina didto sa uptown area diin daghang mga libudsuroy ug street dwellers ang kasagarang maglatagaw aron pagpalimos sa mga bisita ug mga langyaw’ng turista.

Bisan pa ang mga sidewalk gilimpiyohan usab sa kagamhanan sa dakbayan. Samtang naglakaw ko sa dalang Colon sa niaging Huwebes gabii human sa akong trabaho, nahibulong ko ngano wala ang pipila ka sidewalk vendors.

Matud pa sa guwardiya sa usa ka fast food restaurant nga akong gipangutana, gipaundang una kuno ang maong mga vendor tungod sa gipahigayon nga ASEAN Summit meetings dinhi. Dugang niya nga mobalik kuno ang maong mga vendor karong Lunes.

Naandan na kini nga matag adunay internasyonal nga katiguman nga ipahigayon dinhi, tulin pa sa alas kuwatro nga makahipos ang lokal nga kagamhanan sa mga lisudsuroy ug street dweller nga nagkatap sa dakbayan.

Klaro nga nagkulang gayud ang siyudad og mga programa nga permanente nga maghipos niadtong mga batang libudsuroy ug street dwellers. Sa akong nakita misamot na hinuon sila ka daghan tungod lagi kay gipasagdan lang sila sa kagamhanan.

Hinuon aduna kini programa nga magtabang sa mga nagpuyo sa kadalanan pagpauli ngadto sa probinsiya. Apan ang problema mao ang kakulang sa implementasyon niini. Ambot ba nganong wala’y ngipon ang lokal nga kagamhanan sa pagpatuman sa maong programa.

Dili nato ikalimod nga nagkadako na kining problema sa mga libudsuroy nga kabataan ug mga nagpuyo sa kadalanan.  Dako kini nga sagabal sa gipakusgan nga programa sa turismo sa Sugbo. Ang nakapait mao nga nagkulang ang kagamhanan sa aksiyon niini.