Gusto nga angkunon sa kamanghuran ang kabiling balay
Dear Atty. Divine,
Dunay house and lot nga gibilin ang mga ginikanan sa akong bana. Duha sila ka magsuon ug namatay na ang ilang ginikanan. Karon ang manghod sa akong bana miinsister nga siya kuno ang makasunod sa duha ka andana nga balay kay siya man ang kamanghuran. Ang akong bana mireklamo kay matud niya siya ang mitabang sa ilang mga ginikanan sa pagpatukod sa maong balay. Ang akong pangutana attorney, may balaod ba nga automatic maangkon sa kamanghurang anak ang balay sa ilang mga ginikanan nga nangamatay? Unsay angayang buhaton sa akong bana? Daghang salamat. — Susan
Dear Susan,
Base sa atong balaod kun ang mga ginikanan mangamatay ang mga anak niini maoy sumosunod or mo-inherit sa tanang kabtangan nga ilang gibilin. Ang mga anak angay’ng magbahin sa property in equal share. Busa way basehan ang gisulti sa manghod sa imong bana nga siya ang makaangkon sa duha ka andanang balay nga gibilin sa ilang mga ginikanan. Angay nga bahinon nilang duha ang maong property in equal share. Kun magkauyon sila mahimo nga ang usa maoy mopuyo sa ibabaw nga bahin samtang ang usa adto sa unang andana mo-occupy. Mahimo sab nga ang share sa usa, paliton sa usa ka igsuon aron maangkon niya ang tibuok balay. Apan kining tanan magdepende gyud sa ilang panagsabot. Mahimo sab nga ibaligya nila ang property, then ang halin niini mao na lang ang ilang bahinon in equal share. Thanks and God Bless. -Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest