Dengue nikunhod apan mas daghan namatay

MANILA, Philippines - Nikunhod og punto tres porsyento ang ihap sa kaso sa dengue sa Central Visayas base sa report sa Department of Health-7 sukad Enero 1 hangtud sa Abril 1 karong tuiga.

Kini human natala ang 4, 517 ka kaso itandi sa 4,531 sa susamang buwan sa niaging tuig.

Apan nisaka hinoon ang mga namatay sa maong sakit nga niabot og 48 gikan sa 30 kinsa kasagaran sa mga nataptan mao kadtong nag-edad og 6-anyos ngadto sa 10-anyos.

Nag-una gihapon sa adunay labing daghang kaso sa dengue ang Dakbayan sa Sugbo nga adunay 921 ug gisundan sa Mandaue City nga may 408; Lapu-Lapu City, 325; dayon ang Lungsod sa Consolacion ug Dumaguete City.

Matud ni Renan Cimafranca, pangulo sa Regional Epidemiology and Surveillance Unit, nga dili gyud angay mokompiyansa ang katawhan bisan pa og magsugod na ang ting-init tungod kay may magpundo nga tubig nga maitlogan sa lamok.

Gitug-an ni Cimafranca nga ila pa sab susihon ang report sa duha ka minor de edad nga namatay tungod sa dengue sa Dakbayan sa Talisay. Pahinumdum ni Cimafranca ngadto sa mga ginikanan panahon sa ting-init nga pasul-ubon og mga long sleeves o pajama ug leggings ang mga bata o kaha pagbutang sa repellent aron malikay sa pagpaak sa lamok nga posibleng nagdala sa kagaw nga dengue. - /GMR) (BANAT NEWS)