Presyo ng LPG tinapyasan ngayong araw
MANILA, Philippines - Nagpatupad ng bawas-presyo sa Liquefied Petroleum Gas (LPG) ang ilang kumpanya ng langis ngayong araw na ito ng Sabado (Abril 1).
Isang magandang balita para sa mga gumagamit ng cooking gas, dahil pinangunahan ng Petron Corporation ang pagbawas sa presyo ng Gasul at Fiesta Gas ng P5.00 kada kilo na katumbas ng P55.00 bawas presyo sa kada tangke na tumitimbang ng 11 kilogram na epektibo ng alas-12:01 ng madaling araw.
Bukod pa sa cooking gas tinapyasan din ng Petron Corporation ang kanilang Xtend Auto LPG ng P2.80 kada litro.
Asahan naman ang pagsunod ng iba pang kumpanya sa kaparehong bawas-presyo sa cooking gas.
Ayon kay Raffy Ledesma ng Petron Corporation, ang bagong price rollback ay bunsod ng pagbaba ng presyuhan ng LPG sa pandaigdigang pamilihan.
- Latest