Pangandam sa Semana Santa

CEBU, Philippines - Nangandam na ang kagamhanan sa Siyudad sa Sugbo ug Probinsiya sa pag-obserbar sa Semana Santa.

Matud ni Konsehal Dave Tumulak, chairman sa committee on public order and safety sa konseho sa siyudad, nga ang kapolisan, bombero, paramedics ug uban pa wala’y gitugutan nga makabakasyon aron maseguro ang kaluwasan sa publiko.

Nakig-alayon ang siyudad kang Association of Barangay Council president Philip Zafra aron ang kabarangayan magpahinumdum sa mga tanod nga mopahigayon og roving aron malikayan ang mga kawat sa kabalayan.

Pipila sa mga dapit nga hatagan og hugot nga seguridad mao ang mga lugar nga duna’y Station of the Cross sama sa Banawa ug Talamban.

Sunod semana makigtagbo ang konsehal sa mga sakop sa Parish Security Group alang sa seguridad sa mga simbahan.

Samtang gawas sa pagbutang og tulda ug portable toilets, nagbutang na sab og signages ang tagdumala sa Cebu South Bus Terminal sulod sa terminal.

Ang signages anaa gibutang sa taas sa loading area sa mga bus sa terminal aron mahibaw-an ang rota ug destinasyon.

Si Joey Herrera, manager sa CSBT, nagkanayon nga ilang gitinguha nga sa dili pa ang Semana Santa makabutang na sila og directional signages sulod sa terminal aron magiyahan ang mga pasahero kung asa sila mopadulong.

Si Herrera niawhag sa mga bus operators nga sa dili pa modagsa ang mga pasahero atol sa Semana Santa, inspeksiyonon daan ang mga sakyanan aron malikayan ang abiriya.

Ang tagdumala sa CSBT nagplano sa pagbutang og Capitol stickers sa mga bus alang sa adunay lehitimo nga prangkisa.

“Pasabot kung naa ra man gyud mga sticker, mao ray atong pasudlon, sa ato pa legitimate na siya, wala nay mga kolorum, except for those dunay special permits on that day of course makasulod ra sila,” matud ni Herrera.

Sa mga pasahero, ang pangulo sa CSBT subling nipahimangno nga ang Entrance 1 dapit sa usa ka mall mao ang agian alang sa mga gusto mosakay sa mga mini buses ug Ceres bus samtang ang Entrance 2 dapit sa Land Transportation Office (LTO) mao ang padulong sa mga bus nga mobiyahe padulong sa Toledo ug Pinamungajan.

“Kung masayop og sulod, dako na kaayo sila og tuyukanan, unya dili namo sila mapabalik og gawas kay mosamot ang lalis so mahitabo kung ari sila mosulod sa entrance near E-mall and then para Toledo sila mao na nga dako na kaayo ang tuyok unya magyawyaw na sad,” matud ni Herrera.

Ang kapolisan ug militar ang motabang sab sa pagbantay sa terminal atol sa Semana Santa. Decemay P. Padilla ug Le Phyllis F. Antojado (BANAT NEWS)