Prisohan sa Liloan gihigpitan

CEBU, Philippines - Gipatuman ang higpit nga pagbantay sa detention cell sa Liloan Police Station human nasakmitan og shabu ang pipila ka binilanggo sa greyhound operation nga gipahigayon.

Si Senior Police Officer 1 Bryan Batiquin nga nahinabi sa Banat News niingon nga naglakip karon sa ilang gihimo mao ang pagsiksik sa pagkaon ug ang pagbutang ngadto sa laing selda sa tulo ka binilanggo nga ilang nasakmitan og shabu.

Ang tulo giila nga sila si Arnel Noval Mata, 36, taga Dakbayan sa Danao; Jeppe Suralta Rosal, 39, taga San Francisco, Isla sa Camotes nga nasakmitan og lima ka paketeng shabu ug duha sab ka pakete ang nasakmit gikan kang Procopio Segovia Gromia, Jr., 33, taga Catarman, Lungsod sa Liloan.

Gitug-an ni Batiquin ang hilabihan kahuot  sa ilang detention cell tungod kay ang kapasidad nga 20 ka piniriso, 91 ka piniriso na ang kasamtangang nabalhug sa maong bilanggoan.

Gitataw ni Batiquin nga dugay na gyud unta sila nga naghangyo sa mga nagdumala sa Cebu Provincial Detention and Rehabilitation Center nga ibalhin na ang ubang piniriso ilabi na ang giisip nga high value nga binilanggo nga si Jeppe Suralta Rosal nga suspek sa pagpusil patay sa hepe sa kapolisan sa Lungsod sa Poro,  Isla sa Camotes nga si Senior Inspector Jonas Tajanlangit.

Gumikan sa pagkasakmit sa shabu sa maong tulo ka binilanggo, maoy nitumaw karon ang paglahugay sa tanang kapolisan sa lungsod.

Si Cebu Provincial Police Office Director, Senior Superintendent Eric Noble, sa niaging adlaw nipadayag sa iyang plano nga pagbalhin sa tanang sakop sa kapolisan sa lungsod ngadto sa laing police stations. - /GMR) (BANAT NEWS)