Kuwang ra ang polis sa Talisay

CEBU, Philippines - Niprangka ang pangulo sa kapulisan sa Syudad sa Talisay nga dili mahimo nga magtukod pa og police sub-station bisan pa man sa tanyag sa opisyales sa Brgy. Bulacao nga ilang ihatag ang ilang buhatan sa mga polis aron himuong sub-station.

Mao kini ang pagtan-aw ni Supt. Emerson Dante tungod kay matud niya kuwang nang daan ang ilang pwersa diha pa lang sa kasamtangan nilang buhatan.

Siya nipasabot nga ang sakto pagbanabana, ang usa ka lugar nagkinahanglan lang og usa ka polis kada 1,500 ka mga tawo.

Apan sa sitwasyon karon sa Talisay City ang usa ka polis nagbantay og 2,500 ka mga tawo. Ang pwersa sa Talisay City Police muabot lang sa 73 ka police personnel.

Dugang pa niya nga ang pagtukod sa police sub-station nagkinahanglan kini nga makabarog og iya.

Sama sa pagbutang og mga opisyal, desk officers, mobile patrols, ekipo sa komunikasyon ug uban pa nga nihit kaayo bisan sa ilang buhatan karon.

Asoy pa niya nga aduna’y dugang  mga police sa ilaha apan pulos pa kini On the Job Training (OJT).

Si Kapitan Raul Cabañero maoy unang nitanyag sa ilang karaan nga barangay hall aron maoy himuon nga police sub-station nga giuyonan usab ni Mayor Eduardo Gullas.

Si Cabañero nibutyag nga mas maayo nga naa sa ilang lugar ang polis aron nga paspas nga makaresponde sa ilang lugar ug uban nilang silingang mga barangay tungod kay makadaghan nang nahitabo nga dugay kaayong maabot ang mga polis panahon nga nagkinahanglan sila kanila.- /EIM) (BANAT NEWS)