CCLEX groundbreaking madayon

CEBU, Philippines - Madayon karong Marso 2 ang groundbreaking sa Cebu-Cordova Link Expressway (CCLEX) motunga man o dili si Presidente Rodrigo Duterte.

Kini ang gitug-an ni Cordova Mayor Mary Therese Sitoy-Cho.

Matud ni Cho nga dili sila segurado nga makatambong ang Presidente tungod sa ka daghang giatiman nga gimbuhaton.

Sumala pa ni Cho nga humana sila sa documentation sa maong proyekto ug naa na sila karon sa proseso sa marking.

Si Cho nibutyag nga gipaabot nila nga karong tuiga masugdan na ang pagtukod sa taytayan nga mokantidad og dili mominus sa P22 bilyones.

Moabot sa tulo ngadto sa upat ka tuig mahuman ang proyekto ug pipila na lang ka minutos ang biyahe gikan sa Dakbayan sa Sugbo padulong sa Mactan Cebu International Airport nga dili na moagi sa Dakbayan sa Mandaue.

Matud ni Cho nga makahatag sab kini og daghang oportunidad sa mga residente sa lungsod.

Gipasabot ni Cho nga bisan may bayad nga toll fee ang pag-agi sa taytayan isip public-private partnership tali sa Metro Pacific Tollways Development Corporation apan makaminus  gihapon kini sa oras sa pagbiyahe.

Bisan wala pa ang ikatulong taytayan, si Cho niawhag sa katawhan sa pagbisita gihapon sa Cordova tungod kay aduna silay daghan ikapakita sa ilang lungsod nga mga kalambuan sama sa 10,000 Roses Café nga gidagsa karon sa mga turista. (BANAT NEWS)