Bato giplanohan nga palagputon

Ang kahugaw sa organisasyon sa PNP misamot og kaklaro karon nga adunay heneral sa kapolisan nga milutaw’ng nagpaluyo sa pagpatay sa usa ka Korean national sulod mismo sa Camp Crame diin mahimutang ang PNP Headquarters.

Nagduda ko nga sa dili madugay, desisyonan ni Presidente Duterte ang kaugmaon ni PNP Chief Bato dela Rosa. Dakong sagpa sa administrasyon ug mismo sa liderato ni Bato nganong diha pa gyud sulod sa Camp Crame gipatay ang Koreano nga si Jee Ick-joo.

Hinuon, nadakpan na ang nagpatay ni Jee Ick-joo nga si SPO3 Ricky Sta. Isabel. Si Jee nga giingong nalambigit sa negosyo sa ilegal nga drugas, gipatay ni Sta. Isabel sulod sa ilang opisina, tungod sa matud niya, mando sa iyang hepe sa PNP-Anti Illegal Drugs nga si Supt. Rafael Dumlao III. Si Dumlao gi-floating na usab ni Bato tungod sa hitabo.

Dili makatulog si Duterte niining hitaboa. Gigamit sa iyang mga kritiko sa oposisyon ang insidente pagsaway sa sistema sa iyang pakiggubat batok sa mga sindikato sa ilegal nga drugas.

Bisan sa Facebook, daghan ang miingon nga angayan na nga hunongon ang gubat ni Duterte batok ilegal nga drugas tungod sa nahitabo sa Koreano. Apan para nako, dili ang administrasyon ang mapilde kun mopatuo kita sa panawagan ngadto sa administrasyon nga undangon ang kampanya batok drugas. Kun ang problema naglambigit sa badlungong mga sakop sa PNP, ang solusyon mao ang paglimpyo sa organisasyon sa PNP, dili ang pag-undang sa kampanya.

Wala pa’y mitumaw’ng ebidensiya, apan nagtuo ko nga tipik sa “plot” pagpalagpot kang Bato dela Rosa ang nahitabo sa Koreano. Nasayod kita nga hapit tanang mga polis wala makauyon sa palisiya ni Duterte nga limpyohan ang Pilipinas sa drugas, tungod kay kadaghanan sa mga polis – gikan sa mga heneral hangtod sa ubos nga ranggo – nagdawat og protection money gikan sa mga druglords. Suko kaayo sila kang Duterte nga natandog ang ilang “buhay-buhay.”

Wala’y laing isog nga PNP chief gawas kang Bato nga klarong misungag sa iyang mga “upperclassmen” sa PMA. Busa, dili layo ang posibilidad nga gusto sa mga narco-general nga matangtang si Bato aron moluag og balik ang organisasyon sa PNP ug mahagba ang gubat ni Duterte sa drugas.

Nunot ning hitaboa, gusto kaayo ko nga mapasar ang Death Penalty Law aron silotan sa kamatayon ang mga tawo nga makahimo og heinous crimes. Tinuod nga mahal ang kinabuhi sa tawo ug ang Ginoo lang ang magsilot.

Apan kun walay himoon ang gobiyerno, muabot ang panahon nga maghari ang kadautan, nga hasta na sa atong tugkaran adunay mga kriminal nga wala’y kahadlok sa balaod ug sa mga awtoridad kay luag kaayo ang silot, ug ini’g ka priso didto sa National Bilibid Prison, sila ang hari, hayahay ang kinabuhi, ug didto magsugkay og shabu.