Beermen mihubog sa Batang Pier

CEBU, Philippines - Atubangan sa gatosan nila ka mga fans, ang San Miguel Beermen nga gipangulohan ni Cebuano star  JuneMar Fajardo mipakita nga seryoso sila sa ilang kampanya sa pagpanalipod sa korona nila  sa PBA Philippine Cup human pildiha ang GlobalPort Batang Pier, 106-100 sa ilang “out-of-town” game kagabii didto sa HoopsDome sa Lapu-Lapu City.

Tungod niini, ang  Beermen moabante na sa quarterfinals bitbit ang mahinungdanong “twice-to-beat” advantage human nila sirad-i ang unang dapit sa standing sa ilang 9-1 nga baraha.

Mikumbati  ang Batang Pier sa maong duwa hinungdan nga nahimong  kulbahinam ang aksiyon sa first half diin milabaw lang og uno punto ang Beermen, 51-50.

Nagtabla  pagsugod sa final period,  81-all, apan ang San Miguel miratsada sa pagpangulo nila ni Fajardo, Marcio Lassiter ug Arwind Santos.

Si Santos adunay 31 puntos, samtang sila si Fajardo ug Lassiter nagkumboya’g 40 puntos sa  maong kadaugan.

Ang GlobalPort nga midailos ngadto sa 5-4 record, gibidahan ni Stanley Pringle nga mipupo og 21 puntos, samtang si Terrence Romeo mitapos og 16 puntos.

Sa mga duwa karong adlawa, ang Mahindra Floodbuster gusto nga mohirit pa og daog sa dili pa sila manamilit human matagak sa elimination round.

Ang Mahindra makigharong sa Alaska Aces sa alas-4:30 sa hapon.

Sa main game sa alas-7 sa gabii, ang Barangay Ginebra San Miguel laraw nga mosakmit sa ikaduhang dapit sa standing sa ilang pakigsangka batok sa delikadong  Phoenix Fuel Masters. (BANAT NEWS)