Leksyon sa tanan ang suspensyon
CEBU, Philippines - Pangulo sa Cebu City Office on Substance Abuse Prevention Dr. Alice Utlang nihagit sa tanang mga opisyales ug kawani sa barangay sa Dakbayan sa Sugbo nga magpa drug test karon tuiga.
Matud pa ni Utlang, nga maayong panaminan sa tanang mga barangay opisyales ang preventive suspension nga gidangatan sa tanang mga barangay opisyal sa Brgy. Ermita, tungod kay dili lang kini ang barangay nga dili mosuporta sa kampanya sa illegal nga drugas apan aduna pay uban.
Sumala pa ni Utlang, adunay pipila ka mga barangay sa dakbayan ang wala pa gayud sukad-masukad nakapa-drug test sa mga opisyal ug ilang mga ginsakopan, nga wala man unta silay gasto.
Matud ni Utlang nga kining mga opisyales nga wa mosuporta sa drug testing madudahan nga drug protector o basin drug users ba hinuon. Si Utlang nibutyag nga basin sa sunod sila sa COSAP ug CADAC na maoy mopasaka usab og kaso kanila.
Samtang si Ermita Brgy. Kapitan Felicisimo Rupinta nangutana nganong paspas nadesisyonan ang kaso batok kanila .
Si Rupinta nitug-an nga karong nasuspenso sila, kadtong mga pildero kaniadto makalingkod na gyud apan siya nanawagan nga tabangan sila og ampo tungod kay wala man siya naghimo og dautan. Ang director sa Philippine Drug Enforcement Agency 7 Yogi Filemon Ruiz nitug-an nga alarming na ang problema sa ilegal nga drugas sa Ermita tungod kay gawas sa drugas naa pay sugal.
“I am just doing my job. I do my job to the best that I know. Kung unsa akong nakita ug ihatag nga sweldo sa gobiyerno, mao na akong trabahoon. Mao sad na akong isulti nila nga gipili sila sa katawhan, trabahoon ang ilang trabaho,” saysay pa ni Ruiz. Rowena Capistrano ug Jojo Ugdol (BANAT NEWS)
- Latest
