Osmeña: Sakto ra pud ang suspension

CEBU, Philippines -  Gihulagway ni Cebu City Mayor Tomas Osmeña nga sakto ang gibuhat sa Office of the Ombudsman Visayas pagsuspenso sa mga opisyales sa Brgy. Ermita gikan sa ilang kapitan ngadto na sa mga konsehales.

Matud sa mayor ang maong hitabo usa ka maayong oportunidad aron limpyuhan ang barangay gikan sa ilegal nga drugas ug uban pang klase sa bisyo.

Dugang sa mayor karon nga nasuspenso na si Ermita Barangay Captain Felicisimo “Imok” Rupinta mapadayon na sa mga tinugyanan sa balaod ang Anti-Illegal Drug Campaign sa maong barangay.

Una niini, si Rupinta miingon nga dunay bulok-politika ang nahitabo kaniya ug sa iyang mga konsehal aron makabutang ang mayor og iyahang tawo diha sa Brgy. Ermita. Apan si Osmeña miingon dili kini pamolitika kondili pakigbatok sa ilegal nga drugas apan iyang gihulagway nga ang mga barangay nga sakop sa ilang kaatbang naa nikuyanap ang ilegal nga drugas sama sa Lorega-San Miguel, Duljo- Fatima, Pasil, Sawang Calero, Inayawan ug Calamba.

 “Team Rama is a very  close association with a drug infested barangays, as simple as that. Because I don’t tolerate it, so if I fight it, it becomes politically motivated. That’s my politics anti-drugs their politics is pro-drugs, you can call it whatever you want,” sigon pa sa mayor. Subay niini, sigon sa Regional Director sa Department of Interior and Local Government (DILG)-7 Atty. Rene Burdeos  nga maghuwat pa sila pagbuot sa ilang labaw sa kaulohan kun angayan pa nga i-serve ang preventive suspension order.

Gipasabot usab ni Atty. Burdeos nga kun mahurot og suspenso ang mga opisyales, ang presidente lamang sa nasud maoy dunay gahom pag-appoint kun kinsa iyang gustong modumala sa barangay. Decemay P. Padilla (BANAT NEWS)