Tulak-droga uli, napatay
BULACAN, Philippines – Napaslang ang sinasabing notoryus na drug suspek na nasa drug watchlist matapos itong lumaban sa pulisya sa inilatag na buy-bust operation sa loob ng gusaling itinatayo sa Barangay Virgen Delos Flores sa bayan ng Baliwag, Bulacan kahapon ng madaling araw. Kinilala lamang sa alyas Tabuboy ang napatay at nakatira sa Barangay Poblacion sa nabanggit na bayan. Base sa ulat ni P/Supt. Froilan Uy, nakatunog ang suspek sa nagpanggap na poseur-buyer ay isang pulis kaya ito kumasa subalit hindi pumutok ang gamit na baril. Gayunman, inunahan na siya ng mga pulis at napatay sa loob mismo ng gusaling itinayo na ginawang drug den. Narekober ang cal.38 revolver, mga bala, 4 plastic sachet ng shabu, mga drug paraphernalia at ang P500 cash na marked money. Nang suyurin ang buong gusali ay natagpuan ang nagkalat na mga alluminum foil at plastic sachet na ginamit sa pot session.
- Latest