Kagawad tipi sa drug bust

CEBU, Philippines - Dead on arrival sa tambalanan ang barangay konsehal nga giingong nalista nga “High Value Target” sa kalihokan sa drugas diha sa Danao City Police human kini gikatahong nakigpinusilay atol sa buy-bust operation sa Brgy. Malapoc sa Dakbayan sa Danao sa nakalabay nga gabii.

Ang napatay mao si Amador Capin, 42, nagpuyo sa Brgy. Guinacot nga iyang gialagaran.  Ang hepe sa Danao City Police nga si Sr. Insp. Alejandro Batobalonos nga nahinabi sa Banat News miingon nga kanhi tawo ni Alvaro Alvaro alyas Barok ang maong konsehal ug dugay na kining gibadlong.

Matud pa ni Batobalonos nga niadtong nakalabay nga bulan gipatawag na sab sa mayor sa dakbayan ang maong konsehal ug gihangyo nga paundangon na sa pagkalambigit sa drugas.

Human maestorya sa mayor, naestorya usab siya ni Batobalonos human kini mibisita sab sa ilang buhatan ug didto gitug-anan siya niini nga dugay na kining nibiya sa maong ilegal nga negosyo.

Apan ning bag-o nga mga anti-drug operation nga gihimo sa Danao City Police ang ilang mga nadakpan pulos mitug-an nga gikan sa maong kagawad ang drugas nga nasakmit kanila.

Tungod niini, gipanid-an pagbalik si Capin ug ilang nasuta nga tinuod ang alegasyon sa mga una nilang mga nadakpan, tungod niini nihimo sila og buy-bust operation, apan human kini napalitan og drugas nakabantay kini nga asset sa kapulisan ang nakapalit sa iyang drugas ug dali kining midagan.

Si Batobalonos miingon nga ilaha kining gigukod apan gikatahong gipamusil sila sa konsehal hangtod nahitabo ang binawsanay og pusil ug naigo ang konsehal.

Patay na kini pag-abot sa tambalanan sa Danao,.  Nakuha sa mga polis ang usa ka .45 caliber pistol,  upat ka bala, duha ka basiyo niini, usa ka medium size pack nga  gituohang shabu kantidad og P25, 960 ug ang buy-bust money nga P320. Gitug-an ni Batobalonos nga human sa hitabo ang asawa sa konsehal nagpa- blotter sab sa ilang buhatan nga gidiretso lang pagpusil ang iyang bana ug walay nahitabong buy-bust operation.

Hinoon andam si Batobalonos nga moatubang sa kaso kung  moreklamo ang pamilya sa konsehal.

Si Chief Supt. Noli Taliño, pangulo sa Police Regional Office 7 nitug-an nga magsilbi kining leksyon sa mga politiko nga nalambigit sa drugas kay nagpasabot kini nga bisan kinsa pa sila dili sila ilhon sa balaod kun sila nakasala niini.

Sa laing operasyon sa kapulisan sa Danao, nalandig sab sa tambalanan si Marites Dalumpines nga target sa ilang operasyon human nasukarap sa gisakyan nga motorsiklo atol sa pag-ikyas niini diha sa Brgy. Dunggo-an.

Nakuha gikan sa suspetsado ang daghanang shabu nga mikantidad og P119 mil. (/EIM)  (BANAT NEWS)