Mga sam-ang gidugok aron limpyohan ug pasug-an

CEBU, Philippines - Bagang duot sa katawhan ang nisugod na sa pagbisita kagahapon sa mga sementeryo sa Dakbayan sa Sugbo alang sa pagpanglimpyo sa mga nitso ug pagpasuga niini.

Sa Calamba cemetery, P290 ang bayad sa pasuga sa mga nitso samtang sa Carreta Santo Rosario ug Carreta Cathedral cemetery tag P260. Magsugod karong adlawa ang pagpasiga sa mga suga sa mga sam-ang sa siyudad sa Sugbo.

Matud ni Ondo Garvajosa sa Carreta Sto. Rosario nga niadto pang Oktubre 20 sila nagsugod sa pagpahimutang alang sa pasuga. Diin 19 ka trabahante ang naglihok niini. Kasagaran sa problema nga ilang masugatan mao ang pag-ulan kay dili man sila makaladlad sa linya sa kuryente. Maayo na lang kay nahuman ra gyud nila ang ilang trabaho sa wala pa ang gikatakda nga adlaw.

Dugang ni Garvajosa nga karong adlawa igo na lang sila mag-monitor sa mga linya sa kuryente nga ilang gipanaud.

Gibutyag usab ni Pacquito Cotamora sa Carreta Cathedral nga dili mominos dul-an sa 10 mil ka mga suga ang ilang ipangtaod matag tuig hinungdan nga niadtong Oktubre 3 nag-instalar na sila og mga linya sa suga, hinungdan nga gipuli-pulihan kini’g bantay sa napulo ka gwardiya kay adunay mga badlungon nga panguhaon ang ilang gipanaod nga wire.

Asoy pa ni Cotamora nga karong gabii atol sa ilang pagpasiga aduna silay napulo ka lead man nga mobantay sa mga panel sa linya sa kuryente aron kini mamonitor.

Gisugdan na usab sa pagpahimutang sa mga pahibalo kun asa mahimong mosakay ug monaug ang mga tawo nga mobisita.

Gawas sa pagpasuga aduna say namintal sa mga nitso diin adunay binayran ug aduna say uban nga nangunay sa pagpanindot sa nitso sa ilang minahal sa kinabuhi.

Usa na niini ang 5 anyos nga si Inday, kinsa maoy nangunay sa pagpintal sa nitso sa iyang amahan uban sa iyang maguwang ug inahan.

Sumala pa ni Inday samtang namintal sa nitso nga gimingaw na siya sa iyang papa.

Matud sa inahan niini nga si Karen Gonzales nga niadtong niaging tuig, sila ra gihapon sa iyang mga anak ang nanglimpyo sa nitso sa iyang bana nga gipatay sa wala mailhing tawo sa nilabay nga tuig.

Dugang niini nga dili na lang siya magdahum nga mahatagan og hustisya ang iyang bana apan magpabilin kini sa iyang dughan kay nagbilin kini og tulo ka mga anak kaniya. (BANAT NEWS)