Holiday sa Toledo hangtud Nobiyembre 2

CEBU, Philippines - Walay trabaho ang mga pangpublikong buhatan sa Dakbayan sa Toledo hangtud Nobiyembre 2. Kini base sa executive order nga giluwatan ni Toledo City Mayor John Henry Osmeña aron paghatag sa mga kawani sa gobiyerno og higayun nga makasaulog sa kalag-kalag. Ang gideklarar sa Malacañang nga special non-working days mao ang Oktubre 31 ug Nobiyembre 1. Samtang dunay igong biyahe sa barko gikan sa Toledo tabok sa San Carlos City, Negros Occidental alang sa kalag-kalag.

Kini ang gipahibawo ni Rannie Ordonia, branch manager sa Lite Shipping Corporation.

Malaumon si Ordonia nga walay matanggong nga mga pasahero sa pantalan nunot sa kadaghan na sa ilang gitanyag nga biyahe.

Labing sayo gikan sa Toledo alas 4:30 sa kadlawon ug ang last trip sa alas 9 sa gabii.

Samtang hugot nga seguridad ang gipatuman sa pantalan sa Toledo ug nagdugang og security guards ang Philippine Ports Authority alang sa seguridad sa mga pasahero.

Nagtigum usab ang mga representante sa kapolisan, kabomberuhan, mga kompaniya sa barko, Philippine Coast Guard, PPA, City Disaster Risk Reduction and Management Council ug City Health Department alang sa pagpangandam sa kalag-kalag. Matud ni Warren Birao sa City Health Department nga ang uban nga mga ahensiya sa gobiyerno nagsugod na sa pagbantay sa pantalan sugod niadto pang nakalabay’ng semana. Ang CHD magbutang og help desk sugod karong adlawa hangtud sa Nobiyembre 2 diin i-deploy ang mga personahe niini sa pantalan aron mopahigayun og first aid uban sa CDRRMO. (BANAT NEWS)