Mandaue nanglimpiyo batok baha, dengue

CEBU, Philippines - Nipasiugda ang kagamhanan sa Dakbayan sa Mandaue og hiniusang pagpang-limpiyo sa mga kanal ug sapa.

Kini sa tuyo nga gawas nga kapugngan ang pagbaha, kini sab ang magsilbing paagi sa pagpugong sa pagdagsang sa mga lamok nga nagdala og sakit nga dengue.

Si Mayor Gabriel Luis Quisumbing niingon nga may mga plano na unta alang sa hiniusang pagpanglimpiyo sa niaging buwan apan wala mahinayon tungod sa nasinati nga mga kakulian.

Si Quisumbing hugtanong nag-awhag sa mga molupyo sa kabarangayan sa kanunay’ng pagpang-limpiyo.

Gipahinumduman sab ang katawhan sa pagyabo sa nagpundo nga tubig aron dili puy-an sa lamok.

Natala sa Provincial Health Office nga sa gidaghanon sa kaso sa dengue nag-una ang Dakbayan sa Mandaue nga adunay 671 ka kaso ug 13 ang namatay.

Si Dr. Edna Seno, City Health Officer, hugtanon sab nga nag-awhag sa mga molupyo sa dakbayan sa pagdangop dayon sa doktor kung adunay sakop sa pamilya nga balik-balikan sa hilanat. (BANAT NEWS)