Rockets pinasabog Lakers binigyan ng maningning na debut si Walton
LOS ANGELES-- Isang panalo ang ibinigay ng Lakers kay Luke Walton para sa kanyang official head coaching debut.
Umiskor si Fil-Am Jordan Clarkson ng 12 sa kanyang 25 points sa fourth quarter para pangunahan ang Lakers sa 120-114 panalo laban sa Houston Rockets para sa debut ni Walton.
Nag-ambag si D’Angelo Russell ng 20 points at kumolekta si Julius Randle ng 18 points, 7 rebounds at 6 assists para sa Lakers.
“It wasn’t pretty, but it got the job done,” sabi ni Russell.
Sa pinalakas na roster matapos ang worst season sa 16-time champion team’s history, umarangkada ang Los Angeles sa fourth quarter laban sa Houston.
Ginamit ng Lakers ang isang up-tempo offensive game sa ilalim ng 35-anyos na si Walton.
Sinamantala ito ni Clarkson, pumirma ng isang $50 million contract, at ang kanyang 3-pointer ang nagbigay sa Lakers ng 116-112 abante sa huling 1:48 minuto at naimintis ng Rockets ang ilan nilang open shots sa huling minuto ng laro.
Humakot si James Harden ng 34 points, career-high 17 assists at 8 rebounds para pamunuan ang Houston, naimintis ang 15 sa kanilang 16 3-point attempts sa second half.
Sa Orlando, Florida, naglista si Hassan Whiteside ng 18 points, 14 rebounds at 4 blocked shots para igiya ang Miami Heat sa 108-96 panalo laban sa Magic sa kanilang unang laro nang wala sina perennial All-Stars Dwyane Wade at Chris Bosh.
Sa iba pang resulta, dinaig ng Indiana ang Dallas, 130-121; tinalo ng Boston ang Brooklyn, 122-117; pinatumba ng Toronto ang Detroit, 109-91; pinadapa ng Charlotte ang Milwaukee, 107-96; iginupo ng Memphis ang Minnesota, 102-98; tinakasan ng Denver ang New Orleans, 107-102; pinabagsak ng Oklahoma ang Philadelphia, 103-97 at binigo ng Sacramento ang Phoenix, 113-94.
- Latest