Hindi pa magkakahiwalay sina Caguioa at Helterbrand

MANILA, Philippines - Makakasama pa ni Mark Caguioa ang kanyang partner na si Jayjay Helterbrand para sa Barangay Ginebra sa susunod na PBA season.

Ito ay matapos makausap ng 40-anyos na si Helterbrand si two-time PBA Grand Slam champion coach Tim Cone sa isang exit meeting ng mga players kahapon sa Upper Deck gym.

Kinumpirma ni Cone na magbabalik sa line-up ng Gin Kings ang 6-foot-1 na si Helterbrand, ang 2008 PBA Most Valuable Player, matapos ang kanilang pagsikwat sa korona ng katatapos na 2016 PBA Governor’s Cup.

Pipirma si Helterbrand ng one-year contract para sa nine-time PBA champions, ayon kay Cone.

Matapos ang 91-88 pagtakas ng Ginebra sa likod ng buzzer-beating three-point shot ni import Justin Brownlee laban sa Meralco sa Game Six ng season-ending conference ay mangiyak-ngiyak ang 36-anyos na si Caguioa na nakiusap kay Helterbrand na huwag munang magretiro.

“As you could tell, we’re super close off and on the court,” sabi ni Caguioa kay Helterbrand na katuwang niyang gumiya sa Gin Kings sa huling korona noong 2008 PBA Fiesta Cup. “He better not retire man. That’s what I’m saying.”

Si Helterbrand ang ikatlong PBA player sa kasaysayan ng liga na nagkampeon sa edad na 40-anyos pataas matapos sina Robert Jaworski at Ramon Fernandez. (RCadayona)