Inisog nga rally

Daghan ang nakasaway sa gihimo sa drayber niadtong police vehicle nga mipadasmag sa mga tawo nga nagpahigayon og rally atubangan sa United States Consulate kaniadtong miaging adlaw.

Masabot kaayo nga wala na makaagwanta ang polis nga nagmaneho sa sakyanan samtang nagtan-aw sa iyang kaubanan nga gisigihan og bunal sa mga ralyista nga miyama-yama pa sa US Consulate Office.

Dihang gibadlong na sila og ang kapolisan determinado na sa paghimo og lakang nga sila paundangon na sa ilang rally, maisugon sab ang mga ralyista og miuna pagdagmal sa mga polis.

Kadto maoy nakapahukom sa drayber sa police vehicle nga dasmagan ang mga ralyista. Kon magtan-aw ka sa footage nga gipakatap sa social media, makapanguros ka gyud.

Buyno, dili husto ang gihimo sa polis, apan labaw na usab nga dili husto ang gihimo sa mga ralyista nga miyama-yama sa US Consulate Office.  Apan ang paglabay nila og mga pintal ngadto sa kabahin sa US Consulate Office, dili na maayo.

Mahimo nga ang maong hitabo leksyon sa kapolisan ug kakutloan usab og ideya sa mga militant groups nga kon maghimo sila og mga rally dili gayud ipaagi sa inisog.

* * *

Walay "win-win solution" nga makab-ot tali nila ni Osmeña ug Konsehal Joel Garganera kay hangtud karon wala man gyud sila magtagbo aron hisgotan ang pagsulbad sa isyu nga dili na moisyu pa og Temporary Environmental Protection Order (TEPO).

Gusto si Garganera nga magkasultihanay sila si Osmeña sa dili pa ang hearing karong Lunes, apan matud sa mayor nga gusto niya nga adto ra sila si Garganera magsultihanay sa Court of Appeals aron nga dili na matuis sa konsehal kon unsa'y iyang ipanulti.

Hangyoon usab ni Osmeña ang mga justices nga itugot ang live coverage sa media sa proceedings aron makita sa publiko ang maong hearing.

Ang rason ni Osmeña nga anha ra molabay'g mga basura sa Inayawan landfill mao nga usik kaayo ang mga P20 milyones nga magasto sa dakbayan kada buwan pananglit molabay kini pagbalik og basura sa private landfill sa Consolacion.

Apan ang punto usab ni Garganera nga dili maayong palabihon ni Osmeña ang kuwarta ug paantuson lang ang mga lumolupyo sa Inayawan ug kanait nga mga barangay nga matud niya mag-antos sa baho sa basura.

Miinsister si Osmeña nga human mabisibisi og kemikal sa dakbayan ang Inayawan landfill, nahanaw na ang kabaho sa mga basura ug gani wala nay mga tawo nga nangreklamo. Gusto pa gani sa mayor nga moadto sa landfill ang mga justices nga gitugyanan paghusay sa kaso.

Buyno, paabuton nato og unsay sangpotan niining tanan. Labaw na nga angay'ng paabuton ang sunod nga lakang sa mayor kon pananglit moisyu gyud og TEPO ang Court of Appeals.

Kon ang Court of Appeals moisyu og TEPO, ang gipasabot niini mao nga pugngan na si Osmeña sa pagpadayon og labay'g mga basura diha sa landfill.

Pastilan, daan na raba nga si Osmeña nibahad nga kon did-an siya paglabay'g mga basura sa Inayawan landfill, mapugos siya paglabay og mga sagbot diha sa SRP, sa atubangan sa City Hall legislative building ug sa Malacañang sa Sugbo.

Paminaw ko, mosamot kadako sa problema kon buhaton kini sa mayor. Nindot gyud nga hatagan lang og higayon ang dakbayan sa Sugbo nga makapadayon og labay'g mga sagbot diha sa Inayawan landfill apan, kondisyon nga kinahanglang siguroon nga walay baho.