Pagkatalo sa Rio, pampakumbaba
MAY pulitika sa sports. At hindi lang ito ang pulitika ng palakasan sa mga opisyales kaya nawawasak ang sports development ng Pilipinas. Mas malawak ang tinutukoy kong pulitika -- ang epekto ng sports sa isang bansa.
Ihalimbawa ang mga kapit-bansa sa ASEAN kung saan merong malaking sports complex sa bawat distrito. Bata pa ay hinahasa na ang mamamayan nila sa sports. Masigla ang kompetisyong amateur at propesyonal. Sumisigla ang tao. Humahaba ang buhay. Kamakailan kinumpara ko sa atin ang karaniwang lifespan ng lalaki at babae nila:
Haba ng buhay Lalaki Babae
Pilipinas 65.5 72.6
Malaysia 72.0 77.7
Indonesia 69.9 75.2
Thailand 71.2 77.8
Singapore 82.1 87.5
Vietnam 70.7 75.9
Meron ding epektong pulitika ang sports -- sa lakas mismo ng bansa. Nasupalpal ang kayabangan ni Hitler sa mismong 1936 Berlin Olympics. Ipinaggigiitan niya noon ang umano’y angking paghahari ng lahi nilang Aryan -- mga puti ang balat, blond ang buhok, at asul ang mata. Pero nilampaso ng African-American na Jesse Owens ang track and field athletes ng Germany, Europe, at America.
Nu’ng kasagsagan ng Soviet Union tinustusan nang husto ng Russia at mga bansa sa Eastern Europe ang kani-kanilang sports. Nagpapanalo nga ang mga atleta nila sa international competitions, pero nagsisilayas din sa unang pagkakataon. Napahiya sila sa mundo.
Nitong buwan sa Rio Olympics dinurog ng US men’s basketball team ang China, 119-62. Tiyak kukutyain ng mamamayang Tsino ang mga komunistang pinuno nila dahil sa nakakahiyang pagkatalo.
- Latest