Paraluman at makata

Noong kabataa’t nasa college pa lang

Kaysasaya naming mga kabataan

Laging inspirado kung nasa paaralan

Pagkat nakikita ang ‘yung karilagan!

Ikaw ay maganda at lagi kang tampok

Sa mga timpalak ng mga alindog;

Maraming beses nang ikaw ay natampok

Dahil sa ganda mong kairug-irog!

Kung may patimpalak sa minulang bayan

Lagi kang panalo bawat paligsahan;

Tuwina’y mutya ka at patrong mahal

Ipinaparada’t pinararangalan!

Saka nang pumili sa lahat ng kampus

Ng mutyang maganda at kalugud-lugod

Ikaw ang nagwagi’t ganda’y itinampok

Kinilalang ikaw ang pinakabantog!

Kaya nang ilahok sa huling timpalak

Ikaw ang nagwaging maganda sa lahat

Samantalang ako na makatang hamak

Di man lang napansin yaring pusong wasak!

Kaya mula noon na ikaw’y mabantog

Tagahanga ako na sunud nang sunod;

Kung inaaglahi at binabatikos

Sa radio at TV may tula pang handog!