Pambansang dilemma

GANYAN natin mailalarawan ang problema sa paglutas sa  problema sa Abu Sayyaf. Pambansang dilemma.

Ang grupong ito na walang habas sa pangingidnap at pamumugot ng ulo ay kakaiba sa ibang rebeldeng grupo na ideyolohiyang ipinaglalaban. Dahil dito’y hindi ubra ang negosasyon katulad ng ginagawa ng pamahalaan sa CPP-NPA-NDF at mga grupo ng Bangsamoro.

Sabi nga ni Presidential Peace Adviser Jesus Dureza, ang tanging layunin ng Abu ay kumita ng salapi para sa kanilang komunidad. “Pera-pera” wika nga. Kumbaga, ang pangingidnap ay isang industriya sa kanilang lugar na kanilang pinagkakakitaan.

Kaya tingin ko, ito ay isang pambansang dilemma. Ugat nito ay kahirapan at kawalan ng presensya ng pamahalaan sa lugar na kinaroroonan ng mga bandi­dong ito na ang pumoprotekta ay walang iba kundi mga mismong miyembro ng komunidad na pawang ka­anak nila.

Kaya naman hindi makapagsimula ng development program ang gobyerno sa lugar ay hindi ito mapasok dahil tiyak, ang sino mang hindi kilalang mapapadpad doon ay pihong makikidnap.

Hindi naman daw ubrang sabihing bombahin na lang ng minsanan ang kinaroroonan ng mga ito dahil maraming inosenteng tao kabilang ang mga kabataan, katandaan, kalalakihan at kababaihan ang madadamay. Ipinaliwanag ni Dureza na ibang klaseng negosasyon ang isinasagawa ng pamahalaan sa tuwing may kikidnapin ang grupong ito.

Mayroon daw mga kinokontak na tao ang pamahalaan na may direktang pakikiugnayan sa Abu Sayyaf at sila ang nakikipagnegosasyon para sa paglaya ng kanilang mga bihag. Pero kailanman daw ay walang ransom na binabayaran. Kaya sa pamahalaan, wish you all the best na lang.