EDITORYAL - Magkusa na kung wala namang itinatago
MAHALAGA sa mga tumatakbong presidente na maging transparent. Dapat ay walang itinatago. Mas maganda kung malinaw na nakikita ng sambayanan ang pagkatao ng isang tumatakbo sa mataas na tungkulin. Mas gusto ng mamamayan ang taong walang itinatago lalo pa kung ang isyu ay tungkol sa kayamanan.
Inakusahan ni Sen. Antonio Trillanes IV si Davao City Mayor Rodrigo Duterte na may milyong pisong deposito sa Bank of the Philippine Islands (BPI). Pero itinanggi naman ito ni Duterte. Wala raw siyang ganoon kalaking halaga sa banko.
Naghamon si Trillanes kay Duterte na magkita sila sa BPI Branch sa Pasig para buksan ang umano’y account ni Duterte. Nagkasundo sila na magkita noong Lunes. Pero hindi nakarating si Duterte sapagkat may appointment ito sa Davao City. Sa halip, ang kanyang abogado na lamang na si Atty. Salvador Panelo ang nakipagharap kay Trillanes. Sabi ni Panelo, hindi tinanggap ng banko ang Special Power of Attorney na nagbibigay pahintulot na mabuksan ang bank accounts ng mayor. Pitong araw umano ang ibinigay ng banko para ma-release ang detalye ng bank account ni Duterte. Sabi ni Trillanes, dapat mag-isyu ng waiver si Duterte sa bank secrecy ng kanyang deposits. Sabi pa ni Trillanes handa siyang magbitiw sa pagiging senador para lamang mapatunayan na totoo ang kanyang inaakusa.
Wala ngang nangyari sa inantabayanang paghaharap nina Duterte at nag-aakusang si Trillanes. Nagpatutsadahan lamang ang kani-kanilang supporters na sumugod sa BPI-Julia Vargas makaraang walang pagbubukas ng account.
Hindi naman dapat umabot sa ganito ang lahat kung may pagkukusa na ang bawat tumatakbong presidente na ilantad ang lahat kung wala namang itinatago. Ipakita na walang katotohanan ang inaakusa. Harapin at sa harap ng mga kalaban at supporters ay bulatlatin ang dapat bulatlatin. Ang mga taong ayaw magbulatlat ay maaaring may nililihim. Huwag nang hintayin pang paghinalaan. Mahalaga ang transparency sa mga nagnanais mamuno.
- Latest
