EDITORYAL - Todong opensiba vs. Abu Sayyaf!
WALA nang ibang paraan pa para malipol ang Abu Sayyaf kundi ang puspusang opensiba. Walang puknat na pagsalakay ang gawin. Gamitan ng eroplano para maging mabilis ang pagpuksa. Kung hindi ganito karahas ang gagawin, marami pa silang kikidnapin at papatayin gaya ng ginawa sa Canadian tourist na si John Ridsdel.
Pinugutan ng ulo si Ridsdel at inilagay sa isang plastic at iniwan sa isang kalye sa Jolo. Noong Miyerkules natagpuan na ang katawan ng Canadian sa Bgy. Gata, Talipao, Sulu. Dinala ang katawan ni Ridsdel sa Canadian Embassy matapos awtopsiyahin. Kinondena ng Canada ang karumal-dumal na pagpatay kay Ridsdel. Naghihinagpis naman ang kaanak ni Ridsdel sa nangyari.
Kinidnap si Ridsdel noong Setyembre 2015 kasama ang tatlong iba pa sa Samal Island. Umano’y hindi naibigay ang hinihinging ransom kaya pinugutan ang dayuhan. Ang tatlo pang hostages ay ang Canadian na si Robert Hall, Norwegian Kjartan Sikkenstad at ang Pinay na si Maritess Flor. Bukod sa mga nabanggit, bihag din ng Abu Sayyaf ang 14 na Indonesian crewmen at apat na Malaysian seamen.
Noong Huwebes, isang araw makaraang matagpuan ang katawan ni Ridsdel, nireport ng Armed Forces of the Philippines (AFP) na 14 na Abu Sayyaf ang napatay sa walang puknat na operasyon. Ipinag-utos ni President Noynoy Aquino ang all-out war sa Abu Sayyaf. Lipulin ang Abu Sayyaf! Agad nagsagawa ng air strike ang AFP sa kuta ng mga bandido at 14 agad ang napatay sa unang bugso ng opensiba.
Hindi na dapat tantanan ang mga bandido. Ngayong naumpisahan na, ituluy-tuloy na hanggang sa walang matira. Kapag itinigil ang pagsalakay, muli na namang babangon ang mga bandido at magsasagawa ng pangingidnap. Inamin din ng Malacañang na balak palang kidnapin ng Abu Sayyaf si Presidential sister at actress Kris Aquino ganundin si boxing idol Manny Pacquiao.
Tapusin na ang masamang gawain ng Abu Sayyaf. Patunayan ng AFP na mas malakas sila kaysa Abu Sayyaf. Ipakita na kaya nilang lupigin ang mga barbaro.
- Latest
