Bulaklak sa libingan
Magandang bulaklak ang nakikita ko
sa dinaraanang landas ng pagsuyo,
Sa mga bulaklak ang nais ng puso
sila ay pitasin at hagkan nang buo!
Ang mga bulaklak nang aking lapitan
mga rosas silang kapita-pitagan,
Kay gaganda nila’t kaypula ng kulay
Kaya naging lubos ang aking paggalang;
May mga buko pa na gustong bumukad
at hindi pa hinog sa aba ng palad
Kung pipitasin ko’y baka lang manlagas
kaya hihintayin sila’y mamumukadkad!
Saka napansin ko na sa bawat sanga
ay may mga tinik na duduro pala;
Kaya ang hangaring sila ay makuha
hindi itinuloy pinigil ko muna!
Kaya nang dumating sa isang panahon
na ang dating tangka’y ngayon na ituloy –
Ang sumpang bulaklak ay aking pinupol
kasama ang tinik na ipinalumpong!
Bulaklak at sanga ay aking tinuhog
dadalhin sa libing ng tangi kong irog;
Kahit nalagas na ang mga talulot
kay ganda ng rosas sa ulilang puntod!
Sa puntod ng aking mahal na bulaklak
ay bumukad na rin mga bukang rosas;
Ang mga bulaklak na lantang nalaglag
ay mga luha kong nag-iwan ng bakas!
- Latest