EDITORYAL - Madadagdagan ang jobless dahil sa pagmura ng langis
SA survey ng Social Weather Stations (SWS) noong Disyembre 2015, tinatayang 9.1 milyong Pilipino ang walang trabaho. Mas mababa ito kaysa survey ng Setyembre 2015 na umabot sa 10 milyon ang walang trabaho. Pero pinangangambahang madagdagan ang 9.1 milyong jobless kapag umarangkada na ang pagbabawas ng mga kompanya ng langis sa kanilang mga trabahador dahil sa pagbaba ng petroleum products. Patuloy ang pagsadsad ng presyo ng langis at walang nakaaalam kung makababawi. Mula pa Nobyembre 2015 ay nagsimula nang bumulusok ang presyo ng petroleum products. Ang ikinababahala ng mga oil exporting countries, marami silang naiprodyus na langis bago pa ang pagbulusok ng presyo sa pandaigdigang pamilihan. Sobra-sobra ang supply ng langis at walang magawa ang mga bansa ngayong bumababa ang presyo.
Apektado ang mga Pilipinong nagtatrabaho sa Middle East lalo ang mga nasa oil companies sapagkat posibleng magbawas ng manggagawa. May mga OFW na umanong inabisuhan ng kompanya sa Saudi Arabia at Kuwait na magbabawas sila ng manggagawa. May mga OFW naman na nagsabing handa silang magpabawas ng suweldo huwag lamang alisin sa trabaho. Mas mahirap umano na mawalan sila ng trabaho sapagkat walang katiyakan kung mayroon silang makikitang trabaho sa bansa sakali’t umuwi. Matitiis pa umano nilang maliit ang suweldo kaysa walang trabaho. Magugutom umano ang kanilang pamilya at hindi makakapag-aral ang kanilang mga anak.
Sabi naman ng Department of Labor and Employment (DOLE), mayroon na silang nakahandang plano sakali’t mawalan ng trabaho ang OFWs. Mayroon na umano silang mga trabaho na maaaring pasukan ng OFWs subalit hindi nga lang maipapantay sa suweldong tinatanggap nila abroad. Tinatayang 10 milyon ang OFWs at karamihan ay nasa Middle East. Kung patuloy na babagsak ang langis, darami pa ang jobless. Sana nga, may plano ang pamahalaan ukol sa mga OFW na maaalis sa trabaho. Malaking problema ang kahaharapin kung darami pa ang tambay sa bansa. Patuloy na maghanap ng solusyon kung paano tutulungan ang mga OFW.
- Latest
