Totoong SONA: Hikahos dumami

“KUNG walang korap, walang mahirap.” ‘Yan ang presidential campaign slogan ni Noynoy Aquino nu’ng 2010. At nang nanalo siya, dumami ang mahirap. E kasi naman, puro korapsiyon ang inatupag ng mga tauhan niya. Ang pinakaiba lang nito sa sinundang Arroyo admin ay walang palusot sa pagnanakaw ang nauna, samantala ang P-Noy admin ay hipokritong nagpapanggap na malinis.

Ang mga dating pinagnakawan ng Arroyo admin ay ni-ransack din ng P-Noy admin. Parehong kumumisyon sa pag-angkat ng bigas ng National Food Authority. Mas malaki ang rice imports nu’ng panahong Arroyo: Umabot sa 2.2 milyon tonelada para mas maraming kickback. Mas mababa ang imports sa panahong P-Noy, pero pati cargo handling in-overprice nang bilyong piso.

Ang bilyon-bilyon pisong maintenance ng commuter trains ay ibinalato ng P-Noy admin sa mga kapartido Liberal. Mahimala ang kontrata sa vehicle license plate making, at sa pagprankisa ng mga bus. Bilyon-bilyon ang nawaldas sa congressional at presidential pork barrels.

Lahat ‘yan napunta sa bulsa ng iilang maimpluwensiyang politiko. imbis na magugol sa mga proyektong pangkaunlaran. Ang resulta:

• Mas maraming walang trabaho, 4.3 milyon, at kulang sa trabaho, 6.9 milyon, nu’ng 2014. Ito’y bagamat umunlad umano ang ekonomiya nang mahigit 5%; ibig sabihin, mga kapitalista lang ang nakinabang.

• Nanatili ang karalitaan sa 27% mula 30 taong nakalipas. Ibig sabihi’y 27 milyon sa 100 milyong populasyon ang naghihirap.

• Tatlong milyon na lang ang gutom na pamilya nitong 1st-quarter 2014, pinaka-konti nitong dekada, pero 15 milyon katao pa rin sila.

• Umiwas ang foreign investors sa Pilipinas; sa Vietnam, Malaysia, Singapore, Thailand, at Indonesia sila nagpatayo ng mga pabrika.

* * *

Makinig sa Sapol, Sabado, 8-10 ng umaga, DWIZ (882-AM).