MRT-3 tren, riles: Konti lang matino
MAS mahaba ang pila ng pasahero sa istasyon. ‘Yan ang unang pahirap na dadanasin ng sasakay sa MRT-3 sa karaniwang araw. Dalawa ang dahilan. Una, mas konti ang tren. Pangalawa, mas mabagal ang takbo dahil sira-sira na ang riles.
Malamang pa ay magka-aberya sa biyahe, tulad nang biglang hinto; o kaya’y aksidente, tulad ng biglang bukas ng pinto habang bumibirit ang tren. Dalawa rin ang rason. Una, giba na ang signaling system na nag-uugnay ng bawat bagon ng tren, ng mga tren sa isa’t-isa, at lahat sila sa control center. Ikalawa, bulok na ang power supply, kaya nagti-trip-off, tinatablan ng kidlat, o nagliliyab ang catenaries — mga sungay na daluyan ng kuryente mula kable sa itaas patungo sa mga bagon.
Pahirap din sa istasyon. Sira ang elevators, escalators, at ticket vending at validating machines.
Mula Disyembre hanggang ngayon, ni minsan ay hindi nakapagpatakbo ang MRT-3 ng pangakong 20 tren na tig-tatlong bagon, sa peak hours na 6-9 a.m. at 5-8 p.m. Karaniwan ay 14 na tren lang, o 42 bagon. Madalas bumagsak hanggang 11 o 12 na tren, 33 o 36 na bagon. Masuwerte na kung umabot nang 16 na tren, o 48 na bagon.
Ayon sa papeles na nakuha ko sa loob, 16 sa 72 bagon ang wasak. Simula ito nu’ng Okt. 2012, nang alisin ng MRT-3 mula sa Sumitomo ang maintenance, at ilipat sa PH Trams-CB&T na pinamumunuan ng mga kamag-anak ng taga-MRT-3 at kapartido Liberal.
Siyempre dahil palakasan ang nangyari, pinalpak ng bagong kontratista ang maintenance. Kumubra lang ng $1.15 milyon (P51.75 milyon) buwanang bayad, habang hinayaan mabulok ang limang bahagi ng railway system: tren, riles, signaling, power, at istasyon.
Hindi naman masibak ni P-Noy, kasi mapagbigay sa kaibigan.
* * *
Makinig sa Sapol, Sabado, 8-10 ng umaga, DWIZ (882-AM).
- Latest
