Nagbago na sana

Sana ay wala na ang dusa ng bansa

sa rehimeng Pnoy mga katiwala;

tayong Pilipino bata at matanda

sa taong papasok dapat ay masaya!

Sana sa pagdating buwan ng Disyembre

sa mga tahana’y pumasok ang swerte;

walang mga pulis na dumidiskarte

na nagpapatrulya’y daming dinadale!

Sana sa pagsapit ng Pasko at New Year

sa lahat ng dako’y mura ang bilihin;

ubas at mansanas presyo’y mababa na rin

mga maralita’y payapang mag-aliw!

Sana bigas natin bigas na totoo

walang halong ‘feeds’ at ibang perwisyo;

ito ay malinis sariling produkto

mabango’t sariwa pag sinaing ito!

Sana na ay wala nang gulo sa Zamboanga

itong si Misuari sana’y napiit na;

kababayan nating doon ay nagdusa

wasak na tahanan sana ay bago na!

Sana ay wala ng mga pulitiko

na maraming perang dito’y nadispalko;

parusa ng langit ay ating natamo

malakas na lindol at Yolandang bagyo!

Sana ay wala nang mga magnanakaw

mga durugista at mga kriminal;

sana ang hustisya mabilis gumalaw

upang masasama’y agad na mabitay!

Sana magbago na ating gobyerno

masasamang tao’y alisin sa pwesto;

mga  nagpayaman, mga abusado

huwag nang litisin bitayin na ito!