Kusang loob na pagbibitiw
NAG-UMPISANG magtrabaho si Nina sa CMC, isang kompanya ng damit, noong Enero 1990 bilang management coordinator. Matapos ang 10 taon, siya na ang consignment operations manager at isa sa mga pangunahing namamahala sa operasyon ng kompanya.
Isa sa naging sistema ng kompanya ay ang pagbibigay ng cash advance mula sa neto ng benta ng mga supplier/consignor nito. Kailangan lamang na aprubahan ito ng bise presidente (AVP-Finance). May nangyari na isang supplier ang nagreklamo sa sunud-sunod na kaltas sa benta. Nang mag-imbestiga, lumalabas na humigit kumulang P500,000.00 ang nadispalko at sangkot si Nina sa nasabing anomalya.
Noong Pebrero 7, 2000, nagbitiw sa trabaho si Nina. Sumulat pa siya ulit sa kompanya noong Pebrero 15, 2000 upang kumpirmahing muli ang kanyang unang sulat ng pagbibitiw sa tungkulin. Nagpasalamat pa nga siya sa CMC. Pagkatapos ay tumigil na siya sa pagpasok sa trabaho. Datapuwa’t nakikipagkita pa rin siya sa matataas na opisyales ng kompanya tungkol sa kaso.
Enero 13, 2003, nagsampa si Nina ng kasong illegal dismissal laban sa CMC. Ayon sa kanya, napilitan lamang siyang magbitiw sa trabaho upang unahan ang plano ng ilang nakatataas na opisyal na paalisin siya sa tungkulin upang hindi madawit ang mga ito sa anomalya. Ayon kay Nina, sinabi mismo ng AVP-Finance sa harap ng accounting manager na “Mag-resign ka na. Maiipit kami.” Dahil lang daw sa pagkalito at sa takot kaya siya napilitang magsumite ng sulat na nagbibitiw sa trabaho noong Pebrero 15, 2000. Argumento ni Nina, kailangan munang patunayan ng CMC na kusang-loob ang ginawa niyang pagbibitiw at hindi siya tinakot upang gawin ito. Tama ba si Nina?
MALI. Dahil siya ang nagsumite ng sulat, obligasyon niyang patunayan na hindi kusang-loob ang ginawa niyang pagbibitiw sa trabaho.
Upang mapatunayan na tinakot o di kaya’y sapilitan ang kanyang pagbibitiw, kailangan na: 1) ang pananakot ang tunay na dahilan kung bakit siya nagbitiw sa trabaho 2) ang ipinananakot sa kanya ay hindi makatarungan; 3) ang banta sa kanya ay totoo at hindi basta kathang-isip lamang 4) nabuo sa kanyang isip na siya, ang kanyang pamilya at ari-arian ay kayang saktan o at sirain ng taong nananakot sa kanya.
Sa kasong ito, hindi sapat ang kanyang ginawang paratang laban sa AVP-Finance upang mapaniwalaan ng hukuman na sapilitan lamang ang kanyang pagbibitiw. Hindi siya isang ordinaryong kawani kundi isang mataas na opisyal ng kompanya na hindi kayang basta na lang takutin upang magbitiw sa trabaho.
Ang pagbibitiw ni Nina sa trabaho ay boluntaryo o kusang-loob. Hindi siya pinilit o tinakot upang umalis sa trabaho. Patunay dito ang kanyang unang sulat na petsa Pebrero 7, 2000 na kinumpirma pa ng pangalawang sulat na petsa Pebrero 15, 2000. Nilalaman pa nga ng sulat ang kanyang pasasalamat sa kompanya kaya’t malabong manggaling ito sa isang empleyadong napipilitan lamang umanong magbitiw sa trabaho.
- Latest