Pangulo maghahari kung DAP manatili

WALA nang Priority Development Assistance Fund (PDAF), na congressional pork barrel. Dineklara na ito ng Korte Suprema na unconstitutional. At lipas na ang panahon para maglahad ang Kongreso ng motion for reconsideration. Kaya jurisprudence na ito -- bahagi ng mga batas ng bansa. Bawal buhaying muli ang PDAF.

Malamang na matanggal din ang Judiciary Development Fund (JDF), o malimitahan ang poder ng Korte sa pangangasiwa nito. Para sa mga proyektong ikabubuti ng Hudikatura ang JDF; halimbawa, computerization ng mga korte, pagtayo ng courthouses, o pagsasanay sa mga huwes sa pagsuri ng ebidensiya. Pero bilang ganti sa pagbasura sa PDAF, banta ng Kongreso na puputulan ng poder ang Korte na gastahin ang JDF para sa dagdag-allowances at pambiyahe ng mga mahistrado, huwes, at court personnel.

Samantala, nag-motion for reconsideration si President Noynoy Aquino sa Korte. Pinababaliktad niya ang pag-illegalize nito sa kanyang presidential pork barrel na Disbursement Acceleration Program (DAP). Pinagbabantaan pa niya ng komprontasyon ang Korte kung hindi ito pumayag.

Ano nga kaya kung wala nang PDAF, at matanggal din ang JDF, pero ibalik sa kamay ng Presidente ang DAP? Ano ang mangyayari?

Ito ang maaasahan. Magiging mala-diyos ng perang-bayan ang Presidente. Aasa sa kanya ang mga senador at congressman para sa pondong magagasta para pasikatin ang sarili at pagkitaan ng “tong-pats.” Gayundin ang mga mahistrado ng Korte Suprema, Court of Appeals, Sandiganbayan, at Court of Tax Appeals, at mga huwes ng regional, metropolitan, at municipal trial courts. Gayundin ang Office of the Ombudsman, at mga independent Commissions on Elections, on Audit, at Civil Service.

Magiging diktador ang Presidente — balik sa rehimen ni Marcos.