Lola patay sa sagasa, tinakbuhan pa
MANILA, Philippines — Patay ang isang 64-anyos na lola matapos itong ma- hit and run ng isang Toyota Vios habang tumatawid sa Pasay City, kahapon ng madaling araw.
Sanhi ng tinamong matinding pinsala sa ulo at sa katawan, dead on arrival sa Villamor Hospital ang biktima na nakilalang si Edith Ranola, naninirahan sa Villamor Pasay City.
Sa pagsisiyasat ng Pasay City Traffic Bureau, naganap ang insidente ala-1:00 ng madaling araw sa harap ng Villamor Air Base golf course, patungong SLEX sa naturang siyudad.
Nabatid na papatawid ang biktima sa lugar at hindi nito namalayan ang palikong kulay pulang Toyota Vios na hindi naplakahan.
Dito na nasagasaan ang lola at sa lakas nang pagkakabangga ay tumilapon ito.Kaagad namang tumakas ang sasakyang nakasagasa dito at ang biktima naman ay mabilis na isinugod ng rescue team sa naturang ospital, subalit hindi na umabot pang buhay.
Samantala nanawagan naman ang Pasay City Police sa kamag-anak ng biktima na makipag-ugnayan sa kanilang istasyon para sa imbestigasyon.
- Latest
