3 utas sa buy-bust sa Tondo
MANILA, Philippines — Tatlong pinaniniwalaang ‘tulak’ ng iligal na droga ang nasawi nang manlaban sa mga operatiba ng Manila Police District-Station 2 na nagsagawa ng buy-bust operation sa Tondo, Maynila, kahapon ng umaga.
Naisugod pa sa Gat Andres Bonifacio Memorial Medical Center (GABMMC) subalit idineklarang patay ang tatlong subject sa inilatag na operasyon na kinilalang sina John Rey Mascarado; Arnel Torres at Ryan Paglinawan, pawang naglulungga sa loob ng Pier 2, North Harbor, sa Tondo.
Sa ulat ni Manila Police District-Station 2 commander, Supt. Santiago Pascual lll, isinagawa ang buy-bust laban sa tatlo dakong alas-11:25 ng umaga sa loob ng Aduana Business Club Inc,. Pier 2, North Harbor sa pangunguna nina Chief Insp. Rommel Salazar at Chief Insp. Anthony Sy na nagawang makipagtransaksiyon sa pagbili ng P500 halaga ng shabu sa mga suspek.
Nang magka-abutan na ay nakahalata umano ang mga suspek na may mga pulis sa paligid ang papalapit kaya agad nila itong pinaputukan.
Gumanti naman ng putok ang mga operatiba at natamaan ang tatlong suspek.
Dinala pa sila sa kalapit na pagamutan subalit hindi na umabot ng buhay.
Narekober mula sa mga suspek ang isang kalibre 45 baril, 2 kalibre 38; isang sumpak at isang hand grenade at 10 sachet ng shabu at P500 marked money.
- Latest