MRT-3, tumirik uli

MANILA, Philippines — Pinababa ng tren ang may 450 pasahero ng Metro Rail Transit Line 3 (MRT-3) makaraang tumirik ang biyahe nito kahapon ng hapon.

Batay sa abiso ng Department of Transportation (DOTr), nabatid na dakong alas-2:18 ng hapon  nang magkaroon ng technical problem ang isang bagon ng MRT-3 sa Boni Avenue station northbound.

Walang  nagawa ang 450 pasahero kundi bumaba ng bagon matapos silang abisuhan ng pamunuan ng MRT-3  dahil nagkaroon ng electrical failure sa motor ng tren.

Naabala ng anim na minuto at naghintay na lamang sa susunod na bagon ang mga apektadong pasahero patungo sa kani-kanilang mga destinasyon.

Hinatak naman pabalik sa MRT-3 depot sa North Ave­nue, Quezon City ang tumirik na tren.