Bisikleta salpok sa van: 1 patay
MANILA, Philippines — Patay ang isang 32-anyos na lalaki makaraang mabundol siya habang nagbibisikleta ng isang delivery van sa pababang bahagi ng kalsada sa Valenzuela City, Lunes ng gabi.
Agad na nasawi dahil sa matinding pinsala sa ulo at katawan ang biktimang si Gomez Caoyonan Agriam, machine operator, at stay-in sa Rubber Master Corp. sa may Daang Bato, Brgy. Dalandanan ng naturang lungsod.
Arestado naman at nahaharap sa kasong homicide thru reckless imprudence ang driver ng Isuzu Elf aluminum van (RBR-775) na si Julito Dalagan, 53, residente ng Road 02 6B Lower Bicutan, Taguig City.
Sa ulat ng Valenzuela City Police, nagbibisikleta si Agriam sa may T. Santiago Street, Brgy. Viente Reales, nang maganap ang aksidente dakong alas-9:20 ng gabi.
Binabagtas ng biktima ang pabulusok na bahagi ng kalsada at liliko sana pakaliwa nang mabundol ng kasalubong na van. Tumilapon ang biktima sa kalsada at nagtamo ng matinding pinsala sa ulo at katawan dahilan ng kanyang agad na kamatayan.
- Latest
