Sunog sa Mandaluyong: 30 pamilya nawalan ng tahanan
MANILA, Philippines - Kabuuang 30 pamilya ang nawalan ng tahanan at isa ang naitalang nasugatan sa sunog na naganap sa Mandaluyong City, kamakalawa ng gabi.
Ayon sa ulat ng Bureau of Fire Protection (BFP) ng Mandaluyong, dakong alas- 8:37 ng gabi ng sumiklab ang sunog sa junkshop na pag-aari ng isang Felix Lumondang sa Blk. 40, Brgy. Addition Hills ng nasabing lungsod.
Dahil sa maraming basurang nakakalat sa junkshop at gawa sa kahoy ang karamihan sa mga tahanan kaya mabilis na kumalat ang apoy sa mga kalapit na bahay.
Nahirapan din ang mga bumbero sa pagpasok sa nasusunog na mga bahay dahil sa masikip ang kalsada kaya agad na iniakyat sa ikatlong alarma ang sunog.
Dakong alas-10:22 na ng gabi ng ideklarang fire under control na ang sunog na ikinasugat ng isa sa mga residenteng nakilalang lang sa alyas na Kevin, habang ito ay tumutulong sa pag-apula ang sunog.
Lumalabas sa imbestigasyon na napabayaang nilulutong ulam ni Lumondang ang dahilan ng sunog.
Umaabot naman sa P200,000 ang pinsala ng sunog, ayon sa BFP Mandaluyong habang pansamantalang inilagak ang mga apektadong pamilya sa basketball court ng barangay.
- Latest
