4 pang dawit sa pagtatapon ng bangkay ng bebot sa SLEX, sumuko
MANILA, Philippines — Sumuko na kahapon sa Pasay City police ang apat na kalalakihang tumulong umano sa suspect na contractor na itapon ang bangkay ng live-in partner nito sa South Luzon Expressway (SLEX) na pinatay dahil sa selos.
Kinilala ng hepe ng Pasay City Police na si Police Senior Supt. Dionisio Bartolome ang mga sumukong suspect na sina Laurence Anthony Phi, 23; Melvin Astoxga, 18; Russel Torres, 18 at si Danilo Flores, 20, pawang naninirahan sa Maricaban St. ng nasabing lungsod.
Base sa report, ala-1:00 ng madaling araw sumuko ang mga suspect kay Maricaban Police Community Precinct (PCP)-8 commander Police Senior Inspector Ferdinand Duren.
Ayon sa Pasay City Police, nagpatulong umano ang suspect na si Alfredo Torres, 32, sa apat para ikarga ang bangkay ng live-in partner nitong si Clarissalyn Lizardo sa kanyang kulay pulang Nissan Honda Accord na walang plaka.
Hanggang sa itinapon ang bangkay ng biktima sa SLEX area na ng Cabuyao, Laguna.
Ito ay matapos na barilin at patayin ang biktimang si Lizardo ng suspect na si Torres noong Nobyembre 28 sa Maricaban, Pasay City dahil sa selos.
Nitong nakararaang Linggo ay natagpuan nga ang bangkay ni Lizardo sa SLEX.
Nabatid, na nadakip si Torres at ang mekanikong kasabwat nito na si Gabriel Repasa, 32, noong Sabado ng umaga (Disyembre 2) ng mga kagawad ng Cabuyao, Laguna Police sa naturang lalawigan.
Ayon sa apat na suspect, sumuko sila sa pulisya upang ihayag ang kanilang ginawang pagtulong kay Torres.
- Latest