Vendors pinayagan na sa Baclaran
MANILA, Philippines — Ngayong panahon lamang ng Kapaskuhan papayagan ng Metropolitan Manila Development Authority (MMDA) at ng pamahalaang lokal ng Pasay na makapagtinda ang mga vendors sa Baclaran.
Ayon kay Bong Nebrija, MMDA operations supervisor, malayang makapagtitinda na walang takot sa bakanteng lugar na malapit sa Baclaran footbridge ang may 85 vendors.
Posibleng hanggang Enero 6, 2018 lamang sila papayagang magtinda para na rin aniya may kikitain sila at huwag magutom ang kanilang mga pamilya.
Sinabi ni Nebrija, na lalag-yan ng marka ang lugar na sasakupin ng mga vendors para makapagtinda ng sa gayon ay hindi aniya makaabala ang mga ito sa daloy ng trapiko.
Nilinaw ng naturang opis-yal, sa ilalim aniya ng pamamahala ni MMDA Chairman Danilo Lim hindi ito tumututol sa mga vendor para sikaping mabuhay ng tapat at maayos ngayong panahon ng Kapaskuhan.
Gayunman, dapat aniya ay huwag silang maging perwisyo sa iba at huwag makaabala sa daloy ng trapiko.
Sinabi ni Nebrija na patuloy silang magsasagawa ng operasyon kontra anumang uri ng traffic obstruction, subalit mayroon silang puso sa mga maliliit at paiiralin nila ang pagiging makatao.
Matatandaan, na ang 800 metrong kahabaan ng Roxas Boulevard service road, mula EDSA hanggang Rivera St. ay nilinis ng MMDA bilang bahagi ito ng kampanya kontra traffic obstruction at para na rin aniya makabawas ng trapik sa mga pangunahing lansangan ng Metro Manila.
- Latest