Pananabotahe sa MRT, binubusisi na ng NBI
MANILA, Philippines — Sinisimulan nang busisiin National Bureau of Investigation (NBI) ang posibilidad na pananabotahe sa Metro Rail Transit Line 3 (MRT-3) noong nakaraang linggo.
Ito ay matapos na ipag-utos ni Justice Secretary Vitaliano Aguirre kasabay ng pag-isyu ng department order para busisiin ng NBI ang pagkawala ng Messma Card o ang itinuturing na black box ng MRT.
Tuloy aniya ang anggulo ng NBI ng pananabotahe lalo’t may mahirap makalas ang dalawang coach.
“Makikita naman natin na kahit naderail ang tren, kahit tumumba yan magkakabit pa rin”, dagdag pa ni Aguirre.
Una nang sinabi ng Department of Transportation (DOTr) na malaki ang kanilang hinala na may nananabotahe sa kanilang operasyon dahil sa pagkawala ng black box ng tren.
Sinabi ni NBI Director Atty. Dante Guiran na bago pa man ipalabas ng DoJ ang department order ay nagsimula na ang NBI na mangalap ng impormasyon para sa kanilang isasagawang imbestigasyon.
May timeline na rin umano ang NBI para tapusin ang isasagawa nilang imbestigasyon at malaman ang dahilan ng paghiwalay ng bagon sa tren sa pagitan ng Ayala at Buendia station.
- Latest
