Higit 500 huli sa paglabag sa yellow lane
Ito ang araw-araw na mukha ng EDSA kung saan mistulang hindi nasusunod ang yellow lane at motorcycle lane na sinimulan uling mag-higpit na ipinatupad kahapon. Michael Varcas
MANILA, Philippines — Nasa mahigit 500 ang nasampulan ng Metropolitan Manila Development Authority (MMDA) matapos hulihin ang mga ito dahil sa paglabag sa yellow lane sa EDSA.
Nabatid na sa unang araw nang muling pagpapatupad ng yellow lane scheme, ayon kay MMDA assistant general manager for planning Jojo Garcia sa kanilang obserbasyon bahagyang lumuwag sa trapik ang kahabaan ng EDSA.
Ang naging matrapik lamang aniya ay ang southbound lane, bandang EDSA-Guadalupe dahil ang nagpapabara ay ang mga jeep na patungong J.P. Rizal.
Sabi ni Garcia, alas-12:00 ng hapon ay nasa 70 pribadong behikulo ang nahuli ng mga naka-deploy nilang traffic enforcers dahil sa paglabag sa yellow lane scheme, samantalang 37 ang mga bus.
Sa non-contact appre-hension naman, nasa 364 na pribadong behikulo ang nahuli ng MMDA na lumabag din sa naturang traffic scheme at sa mga bus naman ay nasa 114.
Sa kabuuan, nasa 585 na mga motorista ang nahuli ng MMDA, na posibleng tumaas pa aniya ang bilang nito.
Ayon kay Garcia, sa kabila aniya na mahigpit ang kanilang implementasyon sa yellow lane ay marami pa rin aniyang mga motoristang pasaway.
Nabatid na kahapon ang unang araw ng muling implementasyon ng yellow lane kung saan dati na itong pinaiiral, subalit napabayaan lamang.
Sa mga bus na lumabag ay P200 ang multa samantalang sa mga pribadong behikulo ay P500.
- Latest
