Binatilyo patay sa saksak ng ‘solvent boy’
MANILA, Philippines — Hindi na umabot pa nang buhay sa pagamutan ang isang 17-anyos na pedicab driver matapos itong saksakin ng isang ‘solvent boy’ habang natutulog sa isang bangko sa harapan ng isang cafeteria sa Juan Luna St., Tondo, Maynila, kamakalawa.
Kinilala ang biktima na si Reden Roxas Y Salac, residente ng no. 952 Juan Luna St., Tondo.
Nakapiit naman na sa Manila Police District-Homicide Section ang suspek na kinilalang si Jun-jun Tulawan, 22, walang trabaho at kilala sa kanilang barangay bilang ‘adik’ sa kemikal na solvent.
Sa ulat ni SPO1 Joseph Kabigting ng MPD-Homicide Section, naganap ang insidente dakong alas 3:00 ng madaling araw sa tapat ng nakasaradong cafeteria sa J. Luna St., Tondo.
Sinabi ng ina ng biktima na si Charito, 45-anyos, na habang natutulog ang biktima sa isang bangko sa harap ng cafeteria ay nilapitan ng suspek na may hawak na patalim at sinaksak ito sa kaliwang bahagi ng tiyan.
Mabilis na tumakas ang suspek na sinasabing nasa impluwensiya pa ng iligal na droga subalit hinabol siya ng taumbayan at kinuyog bago dinala sa barangay.
Isinugod naman sa pagamutan ang biktima ng tiyahing si Charmaine Salac subalit agad ring binawian ng buhay.
- Latest