2 pulis pinarangalan
Sa pagtulong sa pasaherong naputulan ng braso sa MRT-3
MANILA, Philippines — Pinarangalan at binigyan ng medalya ng Philippine National Police (PNP) ang dalawang pulis ng Eastern Police District (EPD) dahil sa ginawang kabayanihan ng mga ito na tulungan ang isang babaeng pasahero ng Metro Rail Transit Line 3 (MRT-3) na naputulan ng braso kamakailan kaya nailigtas at muli ring naidugtong ang naputol na braso ng biktima.
Ayon EPD Director P/Chief Supt. Romulo Sapitula, binigyan nila ng medalya at kaukulang pagkilala sina PO2 Danilo G. Agustin Jr. at PO1 Ramil R. Almano dahil sa ginawa nilang pagtulong kay Angeline Fernando, 24, na residente ng Tramo, Pasay City.
Sinabi ni Sapitula, ikinatuwa ni PNP Chief Dir. General Ronald ‘Bato’ dela Rosa ang ginawa ng dalawang pulis EPD kaya marapat na pinapahalagahan at dapat na pamarisan ng lahat.
Matatandaang noong Nobyembre 14, 2017, dakong alas-2:35 ng hapon ay bigla na lang nahilo si Fernando pagkababa ng tren sa MRT-3 Ayala Station at nabuwal patungo sa riles ng tren.
Nagkataon namang papaalis na noon ang tren na binabaan niya at tumama ang kanyang kanang braso sa coupler ng tren kaya’t naputol ito.
Maagap namang rumesponde ang dalawang pulis, at sa tulong ng medical intern na si Charlean Jandic ay binigyan nila ng first aid ang biktima at kaagad na isinugod sa Makati Medical Center kung saan muling naidugtong ng mga doktor ang kanyang braso.
- Latest